2008/01/23

「我係徐小姐」前傳

何以徐小姐和MISTER YIK要找毒小姐呢?皆因毒小姐手癢,寫了一封中文公文信。

話如12巴仙銀行在沒有發出任何白紙黑字收據或電話電郵通知的情況下,向毒舌女徵收了不恰當的費用,毒舌女收到月結單後就打電話去查問,接聽電話的徐小姐助理表示徐小姐剛巧放大假,12天後才上班,徐小姐助理會立刻跟進辦理退款手續,並承諾徐小姐上班後會立即聯絡毒舌女。

等到第23天,銀行依然未退款,徐小姐復工已有12天但一個電話都未打過來,多得小木和小治的指導下,毒舌女寫了生平第一封用中文寫的公文信,用雙掛號寄出。

話咁快,翌日網上一CHECK,竟然收到退款,再隔多一天,收到申訴專員的電話。

申:「毒小姐你好!我係12巴仙銀行申訴專員,我姓李。我地收到你封信有關..... (下省)」

正事搞掂後,多咀毒舌女就開始和陌生人閒聊起來。

毒:「你地叫D客保護環境,唔好收月結單,咁如果我冇收月結單就唔知無端端俾人收多錢啦。」
申:「咁唔收月結單都可以上網Download個Statement。」

毒:「但你地個Statement只keep三個月,如果三個月內冇Download到即係冇左個喎...」
申:「所以你一定要個個月都Download囉,我都係慣性咁做,冇問題個喎...」

毒:「咁即係你間銀行Dtransaction成日出現問題所以要不斷咁check?」
申:「咁又唔止我地間銀行係咁,間間都一樣咁衰,所以我地建議客戶最好成日上網check住啦!」

毒:「之但係你地個網都成日Down根本入唔到去個喎...」
申:「咁你都可以利用我地電話熱線o既...」

毒:「但你地D電話熱線確實係成日都打唔通個喎...」
申:「咁你可以去分行做o既...」

毒:「但你地分行Dteller成日掛住Sell人買基金買保險,搞到下下排隊都要成個鐘...」
申:「咁你可以上網做就無人Sell你買基金買保險...」

毒:「都話你地個Server成日Busy,根本唔俾D客log-in入去」
申:「你可以過左繁忙時間先上網嘛...」

毒:「幾時先至係非繁忙時間?」
申:「冇人買賣股票個陣... 」

毒:「咁你地即係買賣股票個D客優先,咁我地呢D唔買賣股票o既客就要讓路?」
申:「都唔係o既,如果個Server繁忙時,是否買賣股票都一樣入唔到o既...」

毒:「咁講,所謂VIP客戶咪即係同一般客戶一樣?」
申:「咁又唔係喎。VIP客戶買本票時免收手續費個喎...」

毒:「咁你係咪建議VIP客戶應該結束戶口買張本票存入去第二間銀行?」
申:「如果結束左戶口,即係唔係VIP客戶,都要收手續費個喎。」

毒:「原來如此。咁Accounts Manager即係形同虛設啦...」
申:「都唔係o既,有需要時會用到佢地o既。上次我們同事出錯,忘記左通知你個Accounts Manager,我叫佢打俾你先啦。」

和申訴專員的對話結束後一小時,電話再度響起,劈頭第一句:「毒小姐係嘛,我係徐小姐。」

毒:「請問係邊位徐小姐?」
徐:「我係你個Accounts Manager徐小姐。」

毒:「請問係邊間公司o既呢?」
徐:「12巴仙銀行呀!D錢退番哪係嘛,我諗住搞掂左先打俾你... 」


「諗住搞掂左先打俾你...」換句話說,
1. 申訴專員所說的「同事出錯忘記通知徐小姐」不正確?
2. 如果內部一直不退錢的話,徐小姐永遠都不會打來?

0 comments:

コメントを投稿